Njótum fjölbreytileikans

Þann 18. mars er alþjóðadagur gegn fordómum.

Eins og undanfarin ár eru æskulýðsfélögin á höfuðborgarsvæðinu beðin um að senda hópa í Smáralindina þennan dag til að taka þátt. Dagskráin stendur yfir frá kl 16:00 - 18:00. Þeir sem mæta kl 16 fá gefins bol og eru málaðir í framan og fá svo haug af nammi til að gefa (og smakka sjálf auðvitað).
Sviðið verður að þessu sinni staðsett hjá kaffihúsinu á neðrihæð Smáralindarinnar (fyrir framan Eymundsson)
 
Í ár fá krakkarnir spennandi aukaverkefni því þrisvar sinnum yfir þennan tíma kemur tilkynning um átakið í hátalarakerfi Smáralindar og þegar það gerist þá frjósa allir krakkarnir í eina mínútu.
Markmiðið er að vekja athygli hjá gestum og gangandi. Engin útskýring verður gefin á þessum lifandi myndastyttum heldur verður þetta í svokölluðum "Flash Mob" stíl. Krakkarnir eiga að frjósa kl 16:30, 17:00 og 17:30.

Það verður spennandi dagskrá út um alla Smáralind þennan dag. Sirkus Ísland leikur listir sínar, leikfélag Kvennó sýnir atriði, Gjörningahópur SGI verður á svæðinu, Leifur breik sýnir og kennir breikdans og auk þess verða fjölmörg verkefni í gangi svo sem mannréttindatwister, fólki boðið upp á að setja fingrafar sitt gegn fordómum og margt fleira.

MEME mun að sjálfsögðu ekki láta sitt eftir liggja. Við viljum að fólk fái að vera það sjálft og þurfi ekki að vera eins og allir hinir til að vera samþykkt.

Mætum í Smáralind og hittumst fyrir framan Eymundsson.

Þórunn | 17.03.2010, 10:23